ოზურგეთის რკინიგზის სადგურთან მდებარე საზოგადოებრივი ტუალეტი უკვე მრავალი წელია ანტისანიტარიის ბუდეა. აუტანელი სუნი და მუდმივად მოუწესრიგებელი გარემო ოზურგეთელების და ოზურგეთის სტუმრების მუდმივ უკმაყოფილებას და პროტესტს იწვევს.
აღნიშნულთან დაკავშირებით სოციალურ ქსელში მოქალაქეები საქართველოს რკინიგზისა და ადგილობრივი ხელისუფლებისგან რეაგირებას მოითხოვენ.
”ეს ხდება ქალაქ ოზურგეთის ცენტრში, რკინიგზის სადგურზე, ეს არის ფეკალური მასებით სავსე საზოგადოებრივი ტუალეტი! იქნებ კეთილი ინებოს მერიამ და დაასუფთაოს და ან გააუქმოს ან რაიმე იღონოს, სირცხვილია უბრალოდ!
ირგვლივ არის აყროლებული სუნი და არის ინფექციების ბუდე!
იქნებ გააშუქოთ ან მიაწვდინოთ ხმა მერიის თანამშრომლებს.” – წერს თემურ ლაჭყეპიანი.
აღნიშნულთან დაკავშირებით ”გურიაTV”-მ ოზურგეთის მუნიციპალიტეტის მერიას მიმართა. მერიაში ამ საკითხზე კომენტარის გაკეთება არ მოისურვეს, თუმცა ცნობილია, რომ ოზურგეთის მერიას საქართველოს რკინიგზისთვის გაგზავნილი აქვს წერილი, სადაც ადგილობრივი აღმასრულებელი ორგანო ხსენებულ საკითხზე რეაგირებას ითხოვს.
”საქართველოს რკინიგზის” პრესსამსახურის განმარტებით, რეგიონებში მდებარე რკინიგზის სადგურები და მასთან არსებული შენობა–ნაგებობები ”საქართველოს რკინიგზის” შვილობილ კომპანიას ”ფროფერთი მენეჯმენტს” ეკუთვნის. პრესსამსახურისვე ცნობით, ოზურგეთის რკინიგზის სადგურის შენობაში უკვე გაკეთდა და დასრულებულია ახალი საპირფარეშოს რემონტი. რაც შეხება შენობის მიმდებარედ არსებულ საზოგადოებრივ ტუალეტს, ”ფროფერთი მენეჯმენტი” ახლო მომავალში მის დემონტაჟს გეგმავს.
Loading ...
