არჩილ თალაკვაძე: გაუქმებულ გვერდებზე „ოცნებისადმი ლოიალური სხვადასხვა სუბიექტის“ ფული იხარჯებოდა

პარლამენტის თავმჯდომარე უარყოფს ფეისბუკის მიერ გაუქმებული ანგარიშებისა და ჯგუფების კავშირს საქართველოს მთავრობასთან და „ქართულ ოცნებასთან“. პარლამენტის თავმჯდომარის თქმით, დაბლოკილ გვერდებზე „ოცნებისადმი ლოიალური სხვადასხვა სუბიექტის“ კერძო ფული იხარჯებოდა. ამის შესახებ არჩილ თალაკვაძემ ტელეკომპანია იმედის გადაცემა “კვირის თემაში” ინტერვიუს დროს განაცხადა.

“არავითარი ბიუჯეტის ფული და სახელისუფლებო რესურსი მანდ არ არის დახარჯული. ეს არის კერძო თანხა, რომელსაც ოპოზიციაც დიდი ალბათობით ხარჯავს და რომელსაც ამ შემთხვევაში ხარჯავდა ჩვენდამი ლოიალური სხვადასხვა სუბიექტი. ჩვენ რა ვქნათ, გამოვიდეთ და ხალხს ვუთხრათ, ჩვენ მხარდამჭერებს, რომლებმაც შექმნეს ასეთი სუბიექტები ვუთხრათ, ნუ ხართ ჩვენი მხარდამჭერები და ოპოზიციას ვუთხრათ რომ გააგრძელეთ დეზინფორმაციის კეთება? ასე ვერ მოხდება”, – განაცხადა თალაკვაძემ.

ფეისბუკის კიბერუსაფრთხოების სამსახურის ხელმძღვანელმა, ნათანაელ გლეიშერმა, 20 დეკემბერს გავრცელებულ განაცხადებაში, აღნიშნა, რომ “მიუხედავად იმისა, რომ ამ ანგარიშების უკან მდგომი ადამიანები ცდილობდნენ დაეფარათ თავიანთი იდენტობა და კოორდინირებული მუშაობა, ჩვენი გამოძიებით, ეს ქმედება უკავშირდება საქართველოს სარეკლამო სააგენტო „პანდასა“ და საქართველოს მთავრობას, რომელსაც მართავს „ქართული ოცნება“ და რომ გვერდების ადმინისტრატორები და ანგარიშების მფლობელები, „აქვეყნებდნენ ადგილობრივ ახალ ამბებსა და პოლიტიკურ ინფორმაციას არჩევნების, სამთავრობო პოლიტიკის, მაღალი რანგის ოფიციალური პირების შესახებ; ასევე აკრიტიკებდნენ ოპოზიციას და ადგილობრივი აქტივისტების ჯგუფებს.“

ფეისბუკის განცხადების მიხედვით, გაუქმებულ გვერდებს მილიონამდე ლარი, დაახლოებით 316 000 დოლარი ჰქონდა დახარჯული ფეისბუკსა და ინსტაგრამზე რეკლამაში, რათა მათი პოსტები ფართოდ გავრცელებულიყო.

“ჩვენ ჩვენი ოფიციალური გვერდები გვაქვს და ვხარჯავთ ჩვენს თანხებს ოფიციალური გვერდების სამუშაოდ და ეს საჯაროდ არის ცნობილი. ამაზე ჩვენ პასუხისმგებელი ვართ…. ფეისბუკში თუ ვინმე არღვევს წესებს მომხრე ვარ, რომ ამაზე რეაგირება გააკეთოს ფეისბუკმა. ჩვენ წესებს არ ვარღვევთ”, – თქვა არჩილ თალაკვაძემ 22 დეკემბერს იმედისთვის მიცემულ ინტერვიუში.

თალაკვაძის თქმით “ქართულ ოცნებას” მხარი დაუჭირა მილიონმა მოქალაქემ. ბევრი მათგანი ევროპასთან დაკავშირებულ აქციაზე თავისუფლების მოედანზე იყო გამოსული. ჩვენ ვნახეთ ოპოზიციის რესურსიც. ეს ადამიანები და მხარდაჭერა, რაც საარჩევნო ყუთებთან ფიქსირდება, ტროლები ხომ ვერ იქნებიან, ეს ჩვენი საზოგადოების რეალური ნაწილია

ტროლი არის სუბიექტი, რომელიც ეწევა საინფორმაციო სივრცეში სხვების შევიწროებას, ვინც ავრცელებს დეზინფორმაციას და ცდილობს რეალობის გადაკეთებას. ვინც ცდილობს ამ ქვეყანაში რეალობის გადაკეთებას?! ყველაზე მთავარი ტროლები ჯერ კიდევ რჩებიან ჩვენს ქვეყანაში”, – განაცხადა პარლამენტის თავმჯდომარემ, ოპოზიციის შესახებ საუბრისას.

„ქართული ოცნების“ მხარდამჭერ გვერდებთან და ანგარიშებთან პირდაპირი კავშირი 22 დეკემბერს უარყო სარეკლამო კომპანია “პანდამაც”, რომელიც ნახსენებია ფეისბუკის 20 დეკემბრის განცხადებაში. კომპანიამ ვიდეომიმართვა გაავრცელა და განაცხადა, რომ ისინი სოციალურ ქსელში დიდ რესურსებს ფლობენ, რომელსაც აქირავებენ, და მედიაში ინფორმაციის “არასწორი ინტერპრეტაციით” გავრცელების გამო ცილისწამების მსხვერპლნი გახდნენ. „პანდამ“ ვიდეო მიმართვაში სახელად „ცილისწამებით დამარხვა“ „ცილისმწამებელთა“ მხილების პირობა დადო.

www.radiotavisupleba.ge