„ადამიანები ამბობენ, რომ პირბადეში იხუთებიან. ლამის, ასე აყენებენ საკითხს, რა მნიშვნელობა არ აქვს, პირბადე მოკლავს თუ კორონაო. ნამდვილად მინდა, ვთქვა და მეცნიერულად არის დადასტურებული, რომ ნახშირორჟანგის მოლეკულის ზომები იმდენად მცირეა, მას ყველანაირი ნაჭრის წინაღობის გადაძლევა შეუძლია. ამიტომ, ადამიანის ორგანიზმში ნახშირორჟანგის შემცველობა არც ერთი პროცენტით არ იმატებს და არ ვარდება ჟანგბადის კონცენტრაცია. ორმაგი პირბადის ტარება ჯანმრთელობისთვის აბსოლუტურად არ არის საზიანო“, – განაცხადა ბიძინა კულუმბეგოვმა.
ალერგოლოგ-იმუნოლოგმა ასევე აღნიშნა, რომ საზოგადოებაში სარქვლოვანი რესპირატორების ტარება საფრთხის შემცველია და უნდა შეიზღუდოს.
„ქალაქში ხშირად მხვდებიან ადამიანები, ვისაც უკეთია საკმაოდ ძვირადღირებული რესპირატორები, რომელსაც გვერდით სარქველი აქვს დამაგრებული. მინდა, ხაზგასმით ვთქვა, რომ საზოგადოებაში სარქვლოვანი რესპირატორის ტარება არ შეიძლება. ეს შეიძლება, იმ ადამიანმა გამოიყენოს, ვინც კოვიდით დაავადებულს უვლის. როცა სარქვლოვან რესპირატორს ვატარებ, ის მე მიცავს, როგორც ადამიანს, მაგრამ თუ მე ინფიცირებული ვარ, გარეთ მაინც ვაფრქვევ. ამიტომ, ძალიან მნიშვნელოვანია იმის ცოდნა, რომ მისი ტარება საფრთხის შემცველია და საზოგადოებაში სარქვლოვანი რესპირატორების ტარება უნდა შეიზღუდოს“, – განაცხადა კულუმბეგოვმა.
მისივე თქმით, განმეორებითი ტესტების დადებითობა ადამიანთა ძალიან მიზერულ პროცენტს უფიქსირდება.
„გამონაკლისი იქნება და ვიღაცას შეიძლება, ორი-სამი თვე ჰქონდეს იმუნიტეტი, მაგრამ საშუალოდ, როგორც ჩანს, ამ ვირუსს ექვსიდან თორმეტ თვემდე ექნება შენარჩუნებული იმუნური პასუხი“, – განაცხადა ბიძინა კულუმბეგოვმა.