საოკუპაციო ძალების წარმომადგენლებმა ხაშურის მუნიციპალიტეტის სოფელ ჩორჩანის ტყის მასივის ჩრდილო-დასავლეთით ახალი ნიშნულები გააკეთეს. ინფორმაციას, ფოტოებს და რუკას ანტისაოკუპაციო მოძრაობა „ძალა ერთობაშია“ ავრცელებს.
მოძრაობის ცნობით, წითლად მონიშნული ხეები და ყვითელი ბანერი რამდენიმე ციფრით, საქართველოს ხელისუფლების მიერ კონტროლირებულ ტერიტორიაზე, საოკუპაციო ხაზიდან დაახლოებით 240 მეტრშია. მოძრაობის ლიდერი დავით ქაცარავა აცხადებს, რომ თუ საოკუპაციო ძალების წარმომადგენლები ამ ხაზს საჩხერის რაიონის მიმართულებით გაუყვებიან, ოკუპირებული აღმოჩნდება ათობით ჰექტარი ტყის მასივი.
როგორც რადიო თავისუფლების კორესპონდენტი გოგა აფციაური განმარტავს, ანტისაოკუპაციო მოძრაობის მიერ გამოქვეყნებული მასალების მიხედვით, ახალი ნიშნულები სოფელ ჩორჩანიდან საკმაოდ დაშორებულია, ამ ტერიტორიის მახლობლად ქართული სოფელი არ მდებარეობს, საოკუპაციო ხაზს მიღმა კი მოქცეულია ოსური სოფელი გვირგვინა.
2019 წელს, ანტისაოკუპაციო მოძრაობის წევრებმა ჩორჩანის ტყეში აღმოაჩინეს ხეებზე ყვითელი ფერის ნიშნულები. მაშინ საქართველოს ხელისუფლებამ ეს ფაქტი ერგნეთში, ინციდენტების პრევენციის და მათზე რეაგირების სამუშაო ჯგუფის შეხვედრაზე გააპროტესტა.
2019 წლის ზაფხულში, ჩორჩანის ტყესთან ქართული პოლიციის საგუშაგო გაიხსნა. ცხინვალის დე ფაქტო ხელისუფლებამ საგუშაგოს აღება მოითხოვა და უარის შემდეგ, ტყეში ახალი გზის გაყვანა დაიწყო და მოსაზღვრე სოფელ წნელისის მახლობლად, საქართველოს ცენტრალური მთავრობის მიერ კონტროლირებულ ტერიტორიაზე დადგა ორი ე.წ. სასაზღვრო საგუშაგო.
www.radiotavisupleba.ge
Loading ...