“ამ ამბავზე საუბრობდა ჩემი ოფისის სამეზობლო…გული სითბოთი ამევსო”- რას წერს ოპოზიციონერი დეპუტატი კახა ასკურავა

ლანჩხუთის მუნიციპალიტეტის საკრებულოს ოპოზიციონერი დეპუტატი საინტერესო ისტორიას ყვება, რომელიც გუშინ, მის ქალაქში მოხდა. ისტორია ორ კეთილშობილ ადამიანს შეეხება, რომლებისთვისაც მთავარი სიკეთის კეთებაა… ეს მცირე შესავალი, დანარჩენს კახა ასკურავას სტატუსიდან შეიტყობთ

“ეს კაცი არის ჩვენი დიდი ხნის მკერავი მურმან ბჟალავა. მთელი რაიონი იცნობს. დღესაც იგივე ადგილზე მუშაობს, სადაც დიდი ხნის წინ. გუშინ მურმანი ბიძიამ ჩვენი ოფისის წინ სკამზე საფულე იპოვა, რომელშიც ამ გაჭირვების დროს საკმაოდ სოლიდური თანხაც იდო. როგორც კი იპოვა ეს საფულე, დაუწყო პატრონს ძებნა და მალევე იპოვა, რადგან დაკარგული საფულის პატრონი, რომელსაც მისი მობილურიც საფულეში ედო, შორს არ ცხოვრობს. ეს ქალბატონიც საოცარი სიკეთის მატარებელია, იგი მიუსაფარ ძაღლებს, რომელიც მრავლადაა ლანჩხუთში, პატრონობს. იმ მომენტშიც პური გქონდა ნაყიდი და იქვე ჩამომჯდარი ძაღლებს აჭმევდა, რაც სხვათა შორის მეც დავინახე ოფისიდან გამოსულმა და გული სითბოთი ამევსო. როცა მორჩა სიკეთის კეთებას, საფულე სკამზე დარჩენია. ასე შეხვდა ორი სიკეთე და ორი კარგი ადამიანი ერთმანეთს – ერთმა დაკარგა სიკეთის კეთების დროს, მეორემ იპოვა და კიდევ უფრო დიდი სიკეთე გააკეთა…… დღეს მოვედი ოფისში და ამ ამბავზე საუბრობდა ჩემი ოფისის სამეზობლო, მეც გადავწყვიტე თქვენთვისაც მომეყოლა, რადგან დღეს ყველაზე მეტად სწორედ, ასეთი ადამიანები, სიკეთე და სიყვარული გვაკლია ადამიანებს.” – წერს კახა ასკურავა