NCDC-ის ხელმძღვანელის, ამირან გამყრელიძის განცხადებით, საქართველოში დღეს COVID-19-ის გავრცელება თითქმის სრულად “დელტა შტამზე” მოდის. გამყრელიძის განცხადებით, დღეს ქვეყანას აქვს ორი იარაღი ვირუსის გავრცელების წინააღმდეგ, ერთია, რეგულაციები, მეორე კი ვაქცინაციის კამპანია.
“დღეს ქვეყანაში 80%-ით დელტა შტამი ცირკულირებს, რომელიც უფრო ძლიერ გადამდებია. გვაქვს ორი იარაღი, რეგულაციების დაცვა. ამ მხრივ შარშანდელთან შედარებით შეცვლილია სიტუაცია, თუკი შარშან უფრო აქტუალური იყო სრული ლოქდაუნები, წელს უკვე ბალანსირებული მიდგომაა, როდესაც ერთის მხრივ ვიცავთ ყველანაირ წესს და კანონს. მეორე კი მთავარი იარაღია, ვაქცინა და აქტიური ვაქცინაციის პროცესი.
მოსახლოების 60%-ის აცრის გეგმა ძალაშია და ეს უნდა მოვასწროთ. იმ საშუალებების ფარგლებში რაც ქვეყანას აქვს სრულდება. ჩვენ ვინდა რომ შევედაროთ ამერიკას და შვეიცარიას, მაგრამ დღეს რომელი ქვეყნების მოსახლეობაა აცრილი 50%-ზე მეტად? ყველა ასეთი ქვეყანა არის OECD-ის წევრი ქვეყნები, ანუ მდიდარი ქვეყნები. დღეს არსებული ერთ-ერთი უდიდესი პრობლემა არის არასამართლიანობა ვაქცინების განაწილებაში. თქვენ თუ დამისახელებთ რომელიმე ქვეყანას, რომელიც ჩვენი ტიპის ეკონომიკური განვითარების დონეზეა და გაზაფხულზევე აცრა მოსახლეობის 50%, მე უკან წავიღებ ჩემ სიტყვებს,”- ტელეკომპანია პირველის ეთერში განაცხადა გამყრელიძემ.
NCDC-ის მონაცემებით, საქართველოში ბოლო 24 საათში 16,028 ადამიანი აიცრა, ჯამურად კი ორჯერადად აცრილია 197,118 ადამიანი, ერთი დოზით კი 444,124 ადამიანი. შესაბამისად, ერთი დოზით მაინც აცრილია მოსახლეობის 11.9%, ხოლო ორჯერადად აცრილია მოსახლეობის 5.28%.
დღეს მთავრობის საკოორდინაციო საბჭომ ახალი გადაწყვეტილება მიიღო, რომლის თანახმადაც ქვეყანაში ღია სივრცეში 5 კაცზე დიდი შეკრების დროს პირბადის ტარება სავალდებულოა.
Loading ...
