ავტომობილების იმპორტი შემცირდა – როგორია ერთი ავტომობილის საშუალო საიმპორტო ფასი

2026 წლის იანვარში, გასული წლის იმავე პერიოდთან შედარებით, საქართველოში მსუბუქი ავტომობილების იმპორტი 39%-ით შემცირდა, – ამის შესახებ ირკვევა სტატისტიკის ეროვნული სამსახურის მონაცემებიდან.

უფრო კონკრეტულად, მიმდინარე წლის იანვარში იმპორტირებულია 149.9 მლნ აშშ დოლარის ღირებულების 9 264 ერთეული ავტომობილი, ხოლო 2025 წლის იმავე თვეში 247.8 მლნ აშშ დოლარის ღირებულების 14 004 ერთეული.

აღსანიშნავია, რომ იანვრის ჭრილში ავტომობილების იმპორტი როგორც ღირებულებაში, ასევე რაოდენობაში, 2022 წლის შემდეგ ყველაზე დაბალ ნიშნულზეა.

ამასთანავე, მონაცემები აჩვენებს, რომ საქართველოს მსუბუქი ავტომობილების იმპორტი 8.5%-ით გაიაფდა. უფრო დეტალურად, 2026 წლის იანვარში თუ ერთი ავტომობილის საშუალო საიმპორტო ფასი გადასახადების გარეშე 16 186 დოლარი იყო, წინა წლის იმავე პერიოდში ღირებულება 17 697 დოლარს შეადგენდა. (ავტორის შენიშვნა: ავტომობილების ფასი მარკის, გამოშვების წლისა და სხვა მახასიათებლების მიხედვით შესაძლოა, საშუალოზე ბევრად მეტი ან ნაკლები ყოფილიყო).

აღსანიშნავია, რომ წელსაც ავტომობილების იმპორტში ამერიკის შეერთებული შტატები ლიდერობდა.

უფრო კონკრეტულად, 5 ქვეყანა, საიდანაც საქართველომ 2026 წლის იანვარში ყველაზე მეტი ღირებულების ავტომობილები შემოიყვანა, ასე გამოყურება:

• აშშ – 84.2 მლნ აშშ დოლარის ღირებულების 6 994 ერთეული;
• იაპონია – 19.7 მლნ აშშ დოლარის ღირებულების 851 ერთეული;
• გერმანია – 13.7 მლნ აშშ დოლარის ღირებულების 172 ერთეული;
• გაერთიანებული სამეფო – 7.6 მლნ აშშ დოლარის ღირებულების 68 ერთეული;
• თურქეთი – 6.8 მლნ აშშ დოლარის ღირებულების 152 ერთეული.

www.bpn.ge