სკანდალი ქართულ სამეფო ოჯახში – დედოფალი მეფეს სასამართლოში უჩივის

ყოფილ სიძეს – დავით ბაგრატიონ-მუხრანელს სამეფო  ოჯახი თაღლითობაში ადანაშაულებს. ნუგზარ და ანა ბაგრატიონ გრუზინსკები დავით ბაგრატიონ-მუხრანელს სამეფო ოჯახის სახელის უნებართვოდ გამოყენებას ედავებიან.
სასამართლო პროცესი საქალაქო სასამართლოში ხვალიდან დაიწყება და მას სამი მოსამართლისგან შემდგარი კოლეგია განიხილავს.

ბაგრატიონ-გრუზინსკები დავით  ბაგრატიონ-მუხრანელს ისტორიის გამყალბებლად მოიხსენიებენ  და დამტკიცების მიზნით  კონკრეტულ ფაქტებს ასახელებენ.

სამეფო ოჯახი სასამართლოსგან დავით ბაგრატიონ-მუხრანელისთვის საქართველოს სამეფო სახელის გამოყენების აკრძალვას და ზიანის ასანაზღაურებლად სიმბოლურად ერთ ლარს ითხოვს.

როგორც ოჯახის ადვოკატი აცხადებს, დავით ბაგრატიონ-მუხრანელს არა აქვს უფლება  საქართველოს სამეფოს სახელით შეხვედრები ჩაატაროს და  საერთაშორისო საზოგადოება შეცდომაში შეიყვანოს.  მისივე თქმით, დავით ბაგრატიონ-მუხრანელს   თავის ვებგვერდზე განთავსებული აქვს ინფორმაცია, რომ ის წარმოადგენს ერეკლე მეორეს შთამომავალს, ასახელებს  ალექსანდრე მეექვსესაც, რომელსაც საქართველოს ისტორიაში არავინ იცნობს.

“ალექსანდრე მეექვსეს სურათად აკაკი წერეთლის სურათი ჰქონდა განთავსებული, რაც საერთაშორისო საზოგადოებისთვის არის გათვლილი,“-ამბობს ნუგზარ და ანა ბაგრატიონ-გრუზინსკების ადვოკატი ლევან გორელაშვილი.

თავის მხრივ, დავით ბაგრატიონ-მუხრანელის ადვოკატი ლევან ჩხეიძე მოსარჩელე მხარეს თვითმარქვიად მოიხსენიებს. ჩხეიძე ამბობს, რომ მათ ნუგზარ ბაგრატიონ-გრუზინსკის DNM-ის ტესტის ჩატარება შესთავაზეს, რათა დაედასტურებინა, რომ ნამდვილად ბაგრატიონების შტოს წარმოადგენდა. ჩხეიძე ამბობს, რომ ნუგზარ ბაგრატიონმა კვლევის ჩატარებაზე უარი განაცხადა, რაც ამძაფრებს ეჭვს,რომ ის თვითმარქვიაა.

საზოგადოებას კარგად ახსოვს წლების წინ გახმაურებული სამეფო ქორწილი. პატრიარქის ინიციატივით, ბაგრატიონების ორი შტო გაერთიანდა და დავით ბაგრატიონ-მუხრანელმა და ანა ბაგრატიონ-გრუზინსკიმ იქორწინეს.

ანამ და დავითმა 2009 წლის 8 თებერვალს, დავით აღმაშენებლის ხსენების დღეს, წმინდა სამების საკათედრო ტაძარში დაიწერეს ჯვარი. სამღვდელო პირების განცხადებით, ეს ქორწინება პატრიარქის ოცი წლის ოცნება იყო.

წყვილმა ცხოვრება საზღვარგარეთ გააგრძელა, მაგრამ მალე გავრცელდა ინფორმაცია, რომ სამეფო წყვილში ბზარი გაჩნდა და ანა და დავითი ერთმანეთს დაშორდნენ. მიზეზი კი შორენა ბეგაშვილის სკანდალური აღიარება გახდა, რომ ის და დავითი საყვარლები იყვნენ. როგორც ცნობილია, ანას პირველი ქმრისგან ორი ქალიშვილი ჰყავს.

გავიდა დრო და სამეფო წყვილი შერიგდა. ამ დროს დაიბადა პატარა გიორგი ბაგრატიონ-ბაგრატიონი, რომელიც ნათლობის დღეს, 2013 წლის 3 ნოემბერს, სრულიად საქართველოს კათოლიკოს-პატრიარქმა ილია მეორემ ბაგრატიონთა დინასტიის მემკვიდრედ გამოაცხადა.

ბაგრატიონები მემკვიდრის დაბადებას დიდი სიხარულით შეხვდნენ. პატარის დაბადებით სამუდამოდ შეიკრა ბაგრატიონთა ორი შტო – გრუზინსკები და მუხრანელები. ამიტომაც ატარებს პატარა გიორგი გვარს – ბაგრატიონ-ბაგრატიონი.

 

Share

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *