”ელ კლასიკო” – დღეს ბარსელონასა და რეალის ლეგენდარული დაპირისპირება შედგება

დღეს, 6 მაისს საფეხბურთო სამყაროში ერთ-ერთი ყველაზე აზარტული დაპირისპირება შედგება. ‘’ნოუ კამპზე’’ ერთმანეთს ის ორი გუნდი ხვდება, რომელთა გამოც ხშირად მთელი მსოფლიოს გულშემატკივრები ორად იყოფიან.

‘’ბარსელონა’’- ‘’რეალი’’ – მორიგი საფეხბურთო დღესასწაული. გარდა იმისა, რომ ‘’ელ კლასიკო’’ ‘’ელ კლასიკოა’’ და მორჩა, დღევანდელი მატჩი კიდევ რამდენიმე, ძალიან მნიშვნელოვანი ფაქტორით არის საინტერესო:

  1. ესპანეთის წლევანდელ ჩემპიონატში ‘’ბარსელონას’’ ჯერ არცერთი თამაში არ წაუგია და აპირებს ისტორიაში პირველი ჩემპიონი გახდეს, რომელსაც ყველა თამაში   მოგებული ექნება.
  2. ‘’საპატიო დერეფანი არ იქნება’’ –  როგორც ჩანს, კლუბები ემოციებს აჰყვნენ და წელს ესპანეთის ჩემპიონატის ცნობილი და ლამაზი ტრადიციის დარღვევას აპირებენ.
  3. ანდრეს ინიესტა ბოლო ‘’ელ კლასიკოს’’ ითამაშებს. დღევანდელი თამაში ლეგენდარული ნახევარმცველისთვის 38 – ე და უკანასკნელი ‘’ელ კლასიკო’’ იქნება.
  4. ‘’რეალს’’ ‘’ბარსელონას’’ კარებში 399 გოლი აქვს გატანილი და სურს დღევანდელ თამაშში გოლების რაოდენობა 400 მდე დაამრგვალოს.

მაშ ასე, მიუხედავად იმისა, რომ ესპანეთის ჩემპიონატის ბედი უკვე გადაწყვეტილია და ‘’ბარსელონას’’ ჩემპიონობაში ხელს ვეღარაფერი შეუშლის, ‘’რეალის’’ დამარცხება კატალონიელების ჩემპიონობას გვირგვინს დაადგამს.

როგორც ვთქვით, წლევანდელ ჩემპიონატზე ‘’ბარსელონას’’ არცერთი მატჩი არ წაუგია, ჩემპიონობამდე ოთხი თამაში აშორებს და თუ კატალონიელები ოთხივე მათგანს მოიგებენ, ესპანეთის ჩემპიონატის ისტორიაში ‘’ბარსელონა’’ პირველი კლუბი იქნება, რომელიც დაუმარცხებელი ჩემპიონი გახდება.

რა თქმა უნდა, ‘’რეალი’’ ამ პრეცედენტის შექმნას ყველანაირად შეუშლის ხელს და მიუხედავად იმისა, რომ წლევანდელ ჩემპიონატში დასაკვეხნი ბევრი ვერაფერი ქნა, ‘’ბარსელონას’’ წინააღმდეგ დღეს საუკეთესო თერთმეტს გამოიყვანს, რათა კატალონიელების წაუგებელი სერია როგორმე შეაჩეროს.

‘’ტრადიცია პირველად ‘’ბარსელონამ’’ დაარღვია, როდესაც მსოფლიო ჩემპიონატის შემდეგ კორიდორი არ გაგვიკეთა’’ – მადრიდელებს ძველ ცოდვას ახსენებს ზიდანი და საპატიო დერეფნის გაკეთებაზე უარს ამ მიზეზით ამბობს.

‘’რეალი” დერეფანს არ გაგვიკეთებს? ამაღამ არ დამეძინება’’ – ირონიული პასუხი აქვს ”რეალის” გადაწყვეტილებაზე ‘’ბარსელონელ’’ ხერარდ პიკეს.

ცალკე საქმეა, ესპანური ფეხბურთის ჯადოქარი, ანდრეს ინიესტა. ‘’ბარსელონას’’ ლეგენდარული ნახევარმცველისთვის ეს ბოლო ‘’ელ კლასიკოა’’. თუმცა არც ამ ფაქტმა და არც ესპანური ფეხბურთის ტრადიციამ, ჩემპიონისთვის საპატიო დერეფანის გაკეთების შესახებ, ვერ აიძულა ‘’რეალი’’ წელს ‘’ბარსელონას’’ საპატიო დერეფანი მოუწყოს.

რაც შეეხება ‘’რეალს’’, მართალია, მადრიდელებს ჩემპიონთა ლიგაში საქმე კარგად აქვთ, მაგრამ ეროვნულ ჩემპიონატში წელს თავი ვერაფრით გამოიჩინეს, ამიტომ დღევანდელ მატჩში მათ ორი მიზანი ექნებათ: არ დაუშვან, ‘’ბარსელონამ’’ წაუგებელი სერია ითამაშოს და კატალონიელების კარში მინიმუმ ერთი გოლი მაინც გაიტანონ. საინტერესოა, რომ ”რეალს” ოფიციალურ მატჩებში ”ბარსელონასთვის” 399 გოლი აქვს გატანილი და ახლა გულშემატკივრები გაფაციცებით ელოდებიან, გავა თუ არა დღეს მე-400 გოლი ”ბარსელონას” კარში.

”ბარსელონა”- ”რეალის” დაპირისპირება ესპანეთის ჩემპიონატის ‘’ელ კლასიკოა’’. პირველი მატში მათ შორის 1902 წელს შედგა, რომელიც ”ბარსელონამ” მოიგო და მას შემდეგ ‘’ელ კლასიკოს’’ მოგება ორივე გუნდისთვის სულ ცოტა, პრესტიჟის საქმე და გულშემატკივრების წინაშე აუცილებელი ვალდებულებაა.

მაშ ასე, დღეს დიდი დღეა, ‘’ელ კლასიკო’’ მთელი თავისი ბრწყინვალებით წარმოგვიდგება და მსოფლიოს თვალწინ ‘’ნოუ კამპზე’’ საფეხბურთო სამყაროში ერთ-ერთი ტრადიციული და ულამაზესი სპექტაკლი გათამაშდება.

დღევანდელ დაპირისპირებას უამრავი გულშემატკივარი ჰყავს გურიაშიც.  ვინ ვინ და გურიაში  ძნელად მოიძებნება  ადამიანი, ვისაც ფეხბურთი ხარიტონ ჩხატარაშვილზე უკეთ ესმის. თვითონ ”რეალის” გულშემატკივარია, თუმცა, ცხადია, ორივე კლუბის შესაძლებლობებს სათანადოდ აფასებს და მთავარ აქცენტს მესისა და რონალდოს დაპირისპირებაზე აკეთებს:

”რეალის” მოტივაცია მეორე ადგილის დაკავებას ვერ ცდება. თანაც”სამეფო კლუბს” ჩემპიონთა ლიგის საგზური უკვე მოპოვებული აქვს. თუმცა ეს ყველაფერი გვერდზე უნდა გადავდოთ. ”ბარსელონას”  და ”რეალის” დაპირისპირებას არანაირი წინაპირობა, სატურნირო მოტივაცია თუ ზედმეტი რეკლამა არ სჭირდება. ეს თამაშ

ი ხომ ორი უდიდესი ფეხბურთელების მესი – რონალდოს დაპირისპირებაა.  ვინ ვის?  ისმის კითხვა. ბოლო ”ელ კლასიკო” 23 დეკემბერს გაიმართა და ‘ბარსას” გამარჯვებით 3-0 დამთავრდა.  გოლები სუარესმა, მესიმ და ვიდალიმ გაიტანეს. საერთო ჩათვლაში უპირატესობა ”რეალს” აქვს:  95 მოგება92- ის წინააღმდეგ. ”რეალს”  ‘ბარსას” კარში 399 გოლი აქვს გატანილი. 

შემდეგი გოლი საიუბილეო იქნება.

მე  გაზრებული და შემტევი ფეხბურთის მომხრე ვარ და ამიტომ ”რეალის” გულშემატკივრად ვრჩები.

ჩემი აზრით, ორივე გუნდი თავისუფალია ზედმეტი წნეხისაგან . ორივე გუნდმა სეზონი წარმატებიით დაამთავრა. ”რეალი” ჩემპიონთა ლიგის ფინალშია. ”ბარსამ” დუბლი გაინაღდა. ეს თამაში იქნება მსოფლიო ფეხბურთის ზეიმი.”

Share

You may also like...

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *