”მოატყუა ერთი,… მოატყუა მეორე.., მოატყუა მესამე…..გუნდურობა ქართულ პოლიტიკაში” – თამაზ ხარაიშვილის ბლოგი

“ხრიკია მხოლოდ პოლიტიკური ძმობა, ერთობა და სიყვარული” _ ესეც მე არ მითქვამს, აკაკიმ თქვა, წერეთელმა,  ათეული წლების წინ, სავარაუდოდ, საქართველოს პოლიტიკურ ცხოვრებაზე დაკვირვების შემდგომ. ახლა რომ ცოცხალი იყოს და სხვიტორის სახლის “ბალკონზე” იჯდეს. ისევ იმასვე იტყოდა, დარწმუნებული ვარ.  საქართველოში პოლიტიკური ერთობის ქვაკუთხედი პოლიტმრწამსი კი არ  არის, არამედ მარად ქართული დილემა: “ამ საქმიდან რა დამრჩება”.  აბა, რას უნდა მივაწეროთ, რომ  იტყვიან, ჩემი გუნდით მოვედიო და მერე დაერევიან ერთმანეთს თანაგუნდელები, ან აღმოჩნდება, რომ გუნდი ვერ არის მთლად  ბრაზილიის ნაკრებივით, ზოგიერთი გუნდშიც და პოლიტიკაშიც  გამოსარჩენისათვის არის მოსული, ან იმიტომაა გუნდში გაერთიანებული, რომ ყველა პასი  “უმფროსს” მიაწოდოს  და მისი გული მოიგოს, თან საკუთარი ქონების უსაფრთხოება დაიცვას და კიდევ უფრო გაზარდოს და გაზარდოს. ზოგიერთი ამას ლობირებასაც უწოდებს.  ასეთთა რიცხვს არ მიეკუთვნება, ჩემი რწმენით, ყოფილი ინტელექტკლუბელი გედევან ფოფხაძე. ალბათ, არც სხვა ქონება აქვს, “ოქროს ბუს” გარდა, მაგრამ მაინც გაერთიანდა იმ გუნდში, რომელსაც ინტელექტით ვერ გამოარჩევ. თუმცა გამკვირვებია, ინტელექტუალი კაცი მაღრაძის, ბესელიასა  და მათ მსგავსთა გვერდით ზის და  მხოლოდ იმაზე გამჯავრდა, რომ ნინია კაკაბაძე რაღაცაში აირჩიეს. შე კაი კაცო, ახლა გამოფხიზლდა შენი ინტელექტი?! აქამდე სად იყავი?! ყველაფერი კარგად მიდიოდა ნინიამდე?! მე, მაგალითად, ის ნინია დიდად არ მეხატება გულზე ( ერთი პერიოდი ერთად ვმუშაობდით ” 24 საათში”), მაგრამ დიდი მამის შვილია და ამიტომაც ვცემ პატივს და მაშინაც სოლიდარობის გრძნობა გამიჩნდა მის მიმართ, როცა მიშა პრეზიდენტმა აგინა კოხტაგორას  მიდამოებში. გედევანის ინტელექტი ადრე უნდა გამოფხიზლებულიყო, პარლამენტში კი არა, სუფრასთანაც არ უნდა დაჯდე ისე, თუ არ მიმოიხედავ ახლო-მახლო.
  კალაძემ რომ თქვა, ჩემი გუნდით მოვედიო, ვიფიქრე, გატუზო და ნესტა ხომ არ მოყავს-მეთქი, მაგრამ უცნობი გოგო-ბიჭების თანხლებით  შეუდგა საქმეს. ღმერთმა ხელი მოუმართოს, მაგრამ, ჯერ-ჯერობით ისევ იმ ოპერაში ვართ…. ისევ “საცობები”, ყვითელი და ჭუჭყიანი ავტობუსები, ხან წყალი მიდის,ხან -დენი, “მარშრუტკებში” ფეხზე დგანან, თუმცა , ისიც ცხადია, რომ ახალი მერი პრობლემებს ხედავს და თუ მათ გადაჭრის, ჩვენც ეგ გვინდა. აი, ნაცემი ნიგერიელები კი შემოვირიგეთ მამაპაპურად…. გუნდურად ვცემეთ, გუნდურად ვეფეხბურთეთ და გუნდურად ვაქეიფეთ….თან ისე, რომ, ალბათ, ფიქრობენ, ნეტა,  კიდევ როდის გაგვლახავენო…
 გუნდურობა, კარგია, მოგეცეს ლხენა, მაგრამ ნესტა და მალდინი რომ გყავს გვერდით…სხვა რამეა… ისე, ფეხბურთი და პოლიტიკა რამ გაყო;  კუჭკუჭის სასამართლოზე ვახტანგ ნინუას გმირი რომ ამბობს, იმისა  არ იყოს: “მოატყუა ერთი,… მოატყუა მეორე,.. მოატყუა მესამე ….. და ა.შ.

Share

You may also like...

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *